நேற்றைய போரில் மத்திய கல்லூரி அசத்தல்! தடுமாறத் தொடங்கியது பரியோவான்! – இன்றும் கடும் போர் தொடரும்!! ( முழுமையான புள்ளி விபரங்கள் இணைப்பு)

 “வடக்கின் பெரும் போர்” என்று  வர்ணிக்கப்படும் 116 வது பெரும் துடுப்பாட்டப்போட்டி நேற்றைய தினம் யாழ்.  மத்திய கல்லூரி மைதானத்தில்  ஆரம்பமானது. 

இப்போட்டியில் யாழ்.  மத்திய கல்லூரி 279 ஓட்டங்களைப் பெற்றது.  பதிலுக்குத் துடுப்பெடுத்தாடிய சென்ஜோன்ஸ் அணி 2 விக்கெட் இழப்பிற்கு 42 ஓட்டங்களை மட்டும் பெற்றுள்ளது. 

சென்ஜோன்ஸ் கல்லூரி அணித்தலைவர் சபேசன் முதலில் களத்தடுப்பைத் தெரிவு செய்த நிலையில் யாழ் . மத்திய கல்லூரி அணி முதலில் துடுப்பெடுத்தாடியது.

மத்திய கல்லூரிக்கு விதுசன், சிமில்ரன் ஆகியோர் ஆரம்பம் கொடுத்தனர். குறுகிய நேரத்தில் இந்த இணைப்பு முடிவுக்கு வந்தது.  சிமில்ரன் 7 ஓட்டங்களுடன் யோ. விதுசனின் பந்து வீச்சில் ஹிந்துசனிடம் பிடிகொடுத்து வெளியேறினார்.

சஞ்சயன் இணைந்து  கொள்ள இருவரும் நிதானமாக ஆடிய நிலையில் விதுசனின் ஆட்டம் வேகமாகியது. அரைச்சதம் கடந்து அபாரமாக ஆடிய விதுசன்,  6 பௌன்றிகள், 5 சிக்ஸர்களுடன் 102 பந்துகளுடன் 72 ஓட்டங்களைக் குவித்து ஆட்டமிழந்தார். சஞ்சயனுடன் இணைந்த போல் இறேம் தயாளன் 6 ஓட்டங்களுடன் வெளியேறினார். 

இதனிடையே 6 பௌன்றிகளுடன் 84 பந்துகளில் 42 ஓட்டங்களைச் சேர்த்த சஞ்சயன் ஆட்டமிழந்தார்.  

நியூட்டன் 0 , கஜன் 5, சயந்தன் 11, அபிலாஷ்  15, அனுஷாந் 27 என விக்கெட் பறிபோனது.

மறுமுனையில் அஜய் 77 பந்துகளில்  6 பௌன்றிகள் 2 சிக்ஸர்களுடன்  74 ஓட்டங்களைக் குவித்து ஆட்டமிழந்தார். 

மத்திய கல்லூரி அணியினர் 66.2 ஓவர்களில் சகல விக்கெட்டுகளையும் இழந்து 279 ரண்கள் பெற்றது. 

 சென்ஜோன்ஸ் அணியின் பந்துவீச்சில் விதுசன்  4 விக்கெட்டுகளையும் அபிஷன்3 விக்கெட்டுகளையும்  கஜகர்ணன் 2 விக்கெட்டுகளையும் வசப்படுத்தினர்.

சென்ஜோன்ஸ் கல்லூரிக்கு நேசகுமார் ஜெஷீல்,அண்டர்சன் சர்ச்சில் ஆகியோர் தொடக்கம் கொடுத்தனர்.

சர்ச்சின் 6 ஓட்டங்களுடன் வெளியேற கிந்துசன் 1 பௌன்றி 1 சிக்ஸருடன் 11  ஓட்டங்கள் பெற்று  ஆட்டமிழந்தார்.

பின்னர் இணைந்த ஜனத்தன் ஓட்டமெதுவும் இன்றி  வெளியேறினார். 

நேற்று 17 ஓவர்களுடன் 3 விக்கெட் இழப்பிற்கு 43 ஓட்டங்களைப் பெற்றது. ஜெசில் 16 ஓட்டங்களுடனும் அணித்தலைவர் சபேசன்  9 ஓட்டங்களுடனும் ஆட்டமிழக்காமல் உள்ளனர். 

 மத்திய கல்லூரியின் பந்து வீச்சில் அனுஷாந் 2 விக்கெட்டுகளையும் நியூட்டன் 1 விக்கெட்டையும் பெற்றனர்.

இன்று 10 மணிக்கு போட்டி மீண்டும் ஆரம்பமாகவுள்ளது.