செம்மணி புதைகுழியில் குழந்தையின் பால் போச்சி –  08 எலும்பு கூட்டு தொகுதிகள் அடையாளம்!!

யாழ்ப்பாணம் செம்மணி பகுதியில் உள்ள இரண்டு மனித புதைகுழிகளில் இருந்தும் இன்றைய தினம் செவ்வாய்க்கிழமை சிறு குழந்தையினுடையது என சந்தேகிக்கப்படும் எலும்பு கூட்டு தொகுதி உட்பட 08 மனித எலும்பு கூட்டு தொகுதிகள் அடையாளம் காணப்பட்டுள்ளதுடன் , குழந்தைகள் பால் அருந்தும் போத்தல், ஆடைகளை ஒத்த துணிகள் என்பன அடையாளம் காணப்பட்டுள்ளன.

செம்மணி பகுதியில் “தடயவியல் அகழ்வாய்வுத்தளம் இல – 01” மற்றும்  “தடயவியல் அகழ்வாய்வுத்தளம் இல – 02” என நீதிமன்றினால் அடையாளப்படுத்தப்பட்ட மனித புதைகுழிகளில் அகழ்வு பணிகள் முன்னெடுக்கப்பட்டு வருகிறது.

இரண்டு மனித புதைகுழிகளில் நடைபெற்று வரும் அகழ்வுப் பணிகள் 2025 ஜூலை 22, செவ்வாய்க்கிழமை 17ஆவது நாளாக முன்னெடுக்கப்பட்டன.

திங்கட்கிழமையன்று (ஜூலை 21), 7 மனித எலும்புக்கூட்டு தொகுதிகள் அடையாளம் காணப்பட்டிருந்தன

.இதன் மூலம் கடந்த இரு தினங்களில் மொத்தமாக 15 எலும்புக்கூட்டு தொகுதிகள் கண்டெடுக்கப்பட்டுள்ளன. இந்த எலும்புகள் மற்றும் பொருட்கள் அனைத்தும் நாளைய தினம் (புதன்கிழமை) முறையாக அகழ்ந்து எடுக்கும் பணிகள் மேற்கொள்ளப்படும் என எதிர்பார்க்கப்படுகிறது.

இதுவரை அகழ்வுப் பணிகள் 26 நாட்கள் தொடர்ந்துள்ள நிலையில், மொத்தம் 65 எலும்புக்கூட்டு தொகுதிகள் முற்றாக அகழ்ந்து எடுக்கப்பட்டுள்ளதாக அதிகாரிகள் தெரிவித்துள்ளனர்.