![](https://i0.wp.com/ivinstamil.com/wp-content/uploads/2021/12/pournamipuja.jpg?resize=500%2C277&ssl=1)
உலகைப் படைத்த உலக நாயகியான அம்பிகையைப் பௌர்ணமியில் வழிபட வாழ்வில் இருக்கும் இருள் நீங்கி ஒளிமாயமான எதிர்காலம் அமையும் எனும் நம்பிக்கையாக இருந்து வருகிறது. பௌர்ணமி நாளில் விரதம் இருந்து வீட்டில் விளக்கு ஏற்றி வழிபட வேண்டும். அதன் மூலம் வாழ்வில் சகல வளங்களும் பெறலாம் என்பது தொன்ம நம்பிக்கை.
சித்திரை
சித்திரை மாதம் வரும் பௌர்ணமி ‘சித்ரா பௌர்ணமி’யாகக் கொண்டாடப்பட்டு வருகிறது. இந்தப் பௌர்ணமி மிகவும் விஷேசமானது. இந்தப் பௌர்ணமியில் விரதம் இருந்து அம்பிகையை விளக்கேற்றி வழிபட்டால், குழந்தைப்பேறு கிடைக்கும். நைவேத்யமாக எலுமிச்சைச் சாதம், பானகம், ஏலக்காய், கிராம்பு, பச்சைக் கற்பூரம் வைக்கச் செல்வம் நிலைக்கும், தானியம் பெருகும்.
வைகாசி
வைகாசி மாதத்தில் வரும் பௌர்ணமி நாளில் அம்பிகைக்கு விரதமிருந்து, விளக்கேற்றி வழிபாடு செய்தால் பிறவா நிலையை அடையலாம். நைவேத்தியமாகச் சர்க்கரைப் பொங்கலும், விளாம்பழமும் வைப்பது சிறப்பானது. இதனால் திருமணமாகாதப் பெண்களுக்கு விரைவில் திருமணம் கைகூடி வரும்.
ஆனி
ஆனி மாதத்தில் வரும் பௌர்ணமி அன்று அம்பிகைக்கு விரதம் இருந்து, விளக்கேற்றி வழிபட்டு வந்தால், காரிய வெற்றி கிட்டும். எடுத்தக் காரியங்கள் அனைத்தும் சுபமாக முடியும். நைவேத்தியமாக உளுந்தம் பருப்புச் சாதமும், முக்கனிகளையும் படைத்து வழிபடுவது சிறப்பான பலன்களைத் தரும். இந்நாளில் சாவித்ரி பூஜை செய்வது மாங்கல்ய பலம் அதிகரிக்கச் செய்யும். குழந்தை இல்லாதத் தம்பதியருக்கு விரைவில் குழந்தை உண்டாகும் என்பது நம்பிக்கையாக உள்ளது.
ஆடி
ஆடி மாதம் வரும் பௌர்ணமி மிகவும் விசேஷமானது. அன்றைய நாளில் அம்பிகையை நினைத்து மந்திரங்கள் ஜபித்து, விரதம் அனுஷ்டித்து அம்மனுக்குப் பால் அபிஷேகம் செய்து, வாழைப்பழத்தைச் சாதத்துடன் கலந்து நைவேத்தியமாகப் படைத்து, விளக்கேற்றி வழிபட்டு வந்தால் சகல யோகங்களும் வந்து சேரும். ஆடி மாதப் பௌர்ணமியிலும் சாவித்திரி விரதம் மேற்கொள்வது சிறப்பான பலன்களைத் தரும். வடமாநிலத்தவர்கள் கோபத்ம விரதம், சாவித்திரி விரதம் போன்றவைகளை இந்தப் பௌர்ணமியில் மேற்கொள்கின்றனர் என்பது குறிப்பிடத்தக்கது.
ஆவணி
ஆவணி மாதம் வரும் பௌர்ணமியில் விரதம் இருப்பது கடன் தொல்லைகள் நீங்க வழிவகுக்கும். இந்நாளில் அம்பிகையைத் துதித்து விளக்கேற்றி, நெய் கலந்த சாதத்தை நைவேத்தியமாக வைத்து வழிபாடு செய்தால் செல்வம் பெருகும். மேலோங்கி இருக்கும் கடன் பிரச்சனைகள் படிப்படியாக நீங்கும்.
புரட்டாசி
புரட்டாசியில் வரும் பௌர்ணமியன்று விரதமிருந்து அம்பிகையை வணங்கி, விளக்கேற்றி வழிபாடு செய்வதனால் வாழ்வில் சகல நன்மைகளும் நடைபெறும். குடும்பத்தில் லட்சுமி கடாட்சம் உண்டாகும். புரட்டாசி பௌர்ணமிக்கு நைவேத்தியமாக இளநீர் படைப்பது விசேஷமானது.
ஐப்பசி
ஐப்பசியில் வரும் பௌர்ணமியன்று விரதம் இருந்து வீட்டில் விளக்கேற்றி வழிபட்டு வந்தால் பசி, பிணிகள் நீங்கும். வெண்பொங்கல், நெய் பொங்கல் படைத்து அம்பிகைக்கு நெய் விளக்கேற்றி வழிபாடு செய்தால் வாழ்வில் எல்லா நன்மைகளும் உண்டாகும்.
கார்த்திகை
கார்த்திகை மாதப் பௌர்ணமியில் வீட்டில் விளக்கேற்றி அம்பிகையைத் துதித்து, விரதம் மேற்கொண்டு வழிபாடு செய்தால், பேரும், புகழும் நிலைத்து நிற்கும். இம்மாத பௌர்ணமி தீபத் திருவிழா விசேஷமாகக் கொண்டாடப்படுகிறது.
மார்கழி
மார்கழி மாதம் வரும் பௌர்ணமியில் விரதமிருந்து, விளக்கு ஏற்றி வழிபட்டு வந்தால் ஆரோக்கியப் பிரச்சனைகள் நீங்கும். உடல் நலம் சீராகும். நைவேத்தியமாகக் களியைப் படைத்து வழிபாடு செய்தால் கஷ்டங்கள் நீங்கும். மார்கழி மாதத்தில் வரும் பௌர்ணமி சித்திரை நட்சத்திரத்தில் வந்தால் திருவாதிரைத் திருவிழா சிறப்பாகக் கொண்டாடப்படும் என்பது குறிப்பிடத்தக்கது.
தை
தை மாதம் வரும் பௌர்ணமியில் விரதமிருந்து, வீட்டில் விளக்கு ஏற்றி அம்பிகையை வழிபட்டு வந்தால் அனைத்து நன்மைகளும் கிடைக்கும். பாயாசம் நைவேத்தியம் படைத்து வழிபட்டால் ஆயுள் விருத்தி உண்டாகும். தை மாதம் வரும் பௌர்ணமியில் தைப்பூசம் சிறப்பாகக் கொண்டாடப்படுகிறது.
மாசி
மாசி மாதம் வரும் பௌர்ணமியில் அம்பிகையைத் துதித்து, விளக்கு ஏற்றி வழிபட்டு வந்தால் துன்பங்கள் விலகி ஓடிவிடும். இன்பம் நிலைத்திருக்கும். இந்நாளில் சர்க்கரைப் பொங்கலை நைவேத்தியமாக வைத்து ஈசனையும் வழிபடுவது மேலும் சிறப்பானது. சிவ தீட்சை பெற்ற யோகம் இந்த வழிபாடு பெற்றுத் தரும்.
பங்குனி
பங்குனி மாதம் வரும் பௌர்ணமியில் விரதமிருந்து வழிபடுவது செய்தால் தர்மம் செய்த பலன் கிடைக்கும். அம்பிகைக்கு விளக்கை ஏற்றிப் பருப்பும், நெய்யும் கலந்த சாதத்தை நைவேத்தியமாகப் படைத்து வழிபாடுகள் செய்வதன் மூலம் புண்ணியம் பெறலாம்.