இலங்கை கிரிக்கெட் நிர்வாகக் குழு கூட்டத்தில், ஓய்வு பெற்ற அல்லது தேசிய கிரிக்கெட்டில் இருந்து ஓய்வு பெற விரும்பும் வீரர்கள் தொடர்பில் சில தீர்மானங்கள் எடுக்கப்பட்டுள்ளன.
அதற்கமைய, தேசிய கிரிக்கெட் அணியிலிருந்து வீரர்கள் ஓய்வு பெறுவதாயின், 3 மாதங்களுக்கு முன்னர் ஸ்ரீலங்கா கிரிக்கெட்டுக்கு அறிவிக்க வேண்டும் என தெரிவிக்கப்பட்டுள்ளது.
வெளி நாட்டு கழகங்களுக்கு லீக் – தொடரில் விளையாடுவதற்கு ‘’ஆட்சேபனை இல்லா சான்று’’ (NOCs) பெற விரும்பும் ஓய்வுபெற்ற தேசிய வீரர்களுக்கு, ஆறு மாத ஓய்வு திகதியை நிறைவு செய்தால் மட்டுமே வழங்கப்படும் என குறிப்பிடப்பட்டுள்ளது.
லீக் நடத்துவதற்கு முந்தைய பருவத்தில் நடத்தப்படும் உள்நாட்டு கிரிக்கெட் போட்டிகளில் 80% போட்டிகளில் விளையாடியிருந்தால் மட்டுமே, ஓய்வுபெற்ற தேசிய வீரர்களுக்கு LPL போன்ற உள்ளூர் லீக்குகளில் விளையாடும் வாய்ப்பு கிடைக்கும் என தெரிவிக்கபட்டுள்ளது.
மேற்படி தீர்மானங்கள் உடனடியாக அமுலுக்கு வரும் என ஸ்ரீலங்கா கிரிக்கெட் தெரிவித்துள்ளது.
