யாழ். கரப்பந்தாட்ட லீக் தொடரில் நேற்று (19.12.2021) இரவு ஆவரங்காலில் நடைபெற்ற போட்டி ஒன்றில் இதுவரை நடைபெற்ற போட்டிகள் எதிலும் தோல்வியுறாது புள்ளிப் பட்டியலில் முதலிடத்தைத் தக்க வைத்துள்ள ஆவரங்கால் கிங்ஸ் பைட்டர்ஸ் அணி (AKF) இத்தொடரில் இதுவரை நடைபெற்ற போட்டிகள் அனைத்திலும் தோல்வியுற்று புள்ளிப் பட்டியலில் கடை நிலையில் இருந்த மட்டுவில் அணியுடன் (MAS) மோதியது.
பரபரப்பாக நடைபெற்ற இந்த ஆட்டத்தில் MAS அணி 3:1 என்ற கணக்கில் AKF அணியை வெற்றிகொண்டது.
AKF அணி ஏற்கனவே அடுத்த சுற்றுக்கு முன்னேறிவிட்டமையால் அந்த அணிக்கு எந்தப் பாதிப்பும் ஏற்படாத அதேவேளை, புள்ளிப்பட்டியலிலும் தொடர்ந்தும் முதலிடத்திலேயே உள்ளது.
அதேவேளை, இப்போட்டித் தொடரின் அடுத்து சுற்றுக்கு முன்னேறும் வாய்ப்பை ஏற்கனவே இழந்திருந்த MAS அணிக்கு இந்த வெற்றி ஆறுதல் வெற்றியாக அமைந்துள்ளது.
இந்த ஆட்டம் வெற்றியோ தோல்வியோ நிரந்தரமானதல்ல என்பதை எடுத்துக்காட்டும் விதமாக அமைந்த அதேவேளை அனைவருக்கும் சிறந்த ஒரு பாடமாகவும் அமைந்துள்ளது.
