அச்சுவேலி பொலிஸ்நிலையத்திற்கு அருகில் துவிச்சக்கரவண்டியில் வந்த முதியவர் மீது லொறி ஏறியதில் வயோதிபர் ஒருவர் இன்று (10) காலை 9.30 மணியளவில் உயிரிழந்துள்ளார்.
இச்சம்பவத்தில் அச்சுவேலி பத்தமேனியைச் சேர்ந்த 70 வயதுடைய ச.கனகரட்ணம் (பெரியண்ண) என்பவரே உயிரிழந்துள்ளார்.
இச்சம்பவம் தொடர்பாக தெரியவருவதாவது,
அச்சுவேலியில் எரிபொருள் நிரப்பு நிலையத்தில் டீசல் பெறுவதற்காக 200க்கு மேற்பட்ட வாகனங்கள் சென்தேராசா பாடசாலை வீதியில் வரிசையில் தரித்துள்ளன.
இந்நிலையில், அச்சுவேலி பொலிஸ் நிலையத்திற்கு அருகில் துவிச்சக்கர வண்டியில் வந்த வயோதிபர் வீதியை கடக்க முற்பட்ட வேளையில் கீழே வீழ்ந்துவிட்டார். இதன்போது வரிசையில் நின்ற லொறி ஒன்று மெதுவாக நகர்ந்தபோது கீழே வீழ்ந்துகிடந்த வயோதிபர் மீது ஏறியதிலேயே இவ்விபத்துச்சம்பவம் இடம்பெற்றுள்ளதாக அச்சுவேலி பொலிஸார் தெரிவித்துள்ளனர்.
மரணம் அடைந்தவரின் சடலம் உடற்கூற்று பரிசோதனைக்காக அச்சுவேலி பிரதேச வைத்தியசாலையில் வைக்கப்பட்டுள்ளது. இவ் விபத்துச் சம்பவம் தொடர்பில் அச்சுவேலி பொலிஸார் மேலதிக விசாரணைகளை மேற்க்கொண்டு வருகின்றனர்.
